რუსეთის კრასნოდარის მხარეზე დრონებით მასშტაბური თავდასხმა განხორციელდა. ინფორმაციას უკრაინული მედია ავრცელებს.
კრასნოდარის მხარის გუბერნატორის, ვენიამინ კონდრატიევის განცხადებით, იერიშის სამიზნე იყო ნოვოროსიისკი, ანაპა, გელენჯიკი და ტემრიუკის ოლქი.
მისი ინფორმაციით, თავდასხმის შედეგად ერთი ადამიანი დაიღუპა, ორი კი დაშავდა. ასევე დაზიანებულია საცხოვრებელი სახლები.
რუსული Telegram-არხების ცნობით, ნოვოროსიისკის პორტში, ნავთობტერმინალსა და სამხედრო ნავსადგურში ხანძარი გაჩნდა.
ამასთან, Reuters-ის ინფორმაციით, დრონებით თავდასხმის შემდეგ ნოვოროსიისკის მარცვლეულის ტერმინალმა მუშაობა შეაჩერა.
გამოცემის წყაროს ცნობით, უკრაინამ გასულ ღამეს ტერმინალს დრონებით შეუტია.
„ტერმინალმა მუშაობა შეაჩერა და გამოწვეული ზარალის შეფასება მიმდინარეობს“, – განუცხადა Reuters-ს ინფორმირებულმა წყარომ.
ტერმინალის მფლობელმა კომპანია Demetra Holding-მა დაადასტურა, რომ ობიექტი თავდასხმის შედეგად დაზიანდა.
ნოვოროსიისკის მარცვლეულის ტერმინალისთვის მიყენებული ზარალის მასშტაბი ამ დროისთვის უცნობია.
