აშშ-ის პრეზიდენტმა დონალდ ტრამპმა დაადასტურა, რომ გასულ თვეში, თურქეთში ნატო-ს სამიტის დასრულების შემდეგ, უსაფრთხოების მიზნით ფარულად შეიცვალა თვითმფრინავი.
„საიდუმლო სამსახურისა და სამხედროების მითითებებს ვემორჩილები. მათ სურდათ, რომ სხვა რეისით, სხვა თვითმფრინავით გავმგზავრებულიყავი. უბრალოდ, უნდა გავაკეთო ის, რასაც ისინი მეუბნებიან“, – განუცხადა ტრამპმა ჟურნალისტებს.
მანამდე მედიაში გავრცელდა ინფორმაცია, რომ თურქეთიდან გამგზავრებისას განხორციელდა უსაფრთხოების განსაკუთრებული ოპერაცია, რომელიც, გავრცელებული ცნობებით, ირანის მხრიდან შესაძლო თავდასხმის საფრთხეს უკავშირდებოდა.
The Washington Post-ის ინფორმაციით, ტრამპი თავდაპირველად ანკარაში კამერების წინ Air Force One-ში ავიდა, თუმცა რამდენიმე წუთში ბორტი ფარულად დატოვა. გამოცემის ცნობით, ის აეროპორტის კვების მომსახურების სატვირთო მანქანის მეშვეობით გადაიყვანეს აშშ-ის სამხედრო-საჰაერო ძალების C-32A ტიპის თვითმფრინავში, რომლითაც გაერთიანებულ სამეფოში გაფრინდა.
მედიის ინფორმაციით, ოპერაცია შენიღბვის მიზნით დაიგეგმა. CBS News-ის ცნობით, აშშ-ის ოფიციალურმა პირებმა დააფიქსირეს სარწმუნო საფრთხე, რომ ირანს პრეზიდენტის თვითმფრინავის მიმართულებით რაკეტის გაშვება შეეძლო.
The Washington Post ასევე წერს, რომ C-32A გაერთიანებულ სამეფოში დაახლოებით 22:20 საათზე დაეშვა, ხოლო Air Force One, რომელშიც მედიის წარმომადგენლები იმყოფებოდნენ, რამდენიმე წუთის შემდეგ ჩავიდა. გამოცემის ცნობით, უცნობია, როგორ დააბრუნეს ტრამპი მოგვიანებით კვლავ Air Force One-ზე.
