ზელენსკი: უკრაინა პოლიტიკურ სტრატეგიას ცვლის – მთავრობასა და ძალოვან უწყებებში საკადრო ცვლილებები იწყება

უკრაინის პრეზიდენტმა, ვოლოდიმირ ზელენსკი განაცხადა, რომ ქვეყანა პოლიტიკურ სტრატეგიას ცვლის, რის უზრუნველსაყოფადაც მთავრობასა და სამართალდამცავ უწყებებში მასშტაბური საკადრო ცვლილებები განხორციელდება.

ზელენსკის თქმით, ცვლილებები პრემიერ-მინისტრ იულია სვირიდენკოსთან განიხილა და მას უკრაინის ერთ-ერთ მთავარ პარტნიორთან ურთიერთობების ახალი და მნიშვნელოვანი მიმართულების ხელმძღვანელობა შესთავაზა.

„დეტალები უკრაინის პრემიერ-მინისტრ იულია სვირიდენკოსთან განვიხილეთ. დავადგინეთ, რომ ეს ცვლილებები მინისტრთა კაბინეტის განახლებას მოითხოვს. მადლობელი ვარ იულიასი პრემიერ-მინისტრის თანამდებობაზე მისი მკაფიო, სტაბილური და ეფექტური მუშაობისთვის, უკრაინის გუნდში მრავალწლიანი პროდუქტიული სამსახურისთვის და შევთავაზე მას შესაძლებლობა, უხელმძღვანელოს ურთიერთობების ახალ და მნიშვნელოვან სფეროს მთავარ პარტნიორთან. ველოდები, რომ პარლამენტის წევრებთან ერთად შესაბამის ცვლილებებს განვახორციელებთ უკრაინის მთავრობაში. ცვლილებები ასევე იქნება სამართალდამცავი ორგანოების ხელმძღვანელებში“, – განაცხადა ზელენსკიმ.

პრეზიდენტის განმარტებით, საგარეო პოლიტიკის თითოეულ პრიორიტეტულ მიმართულებაზე პასუხისმგებელი კონკრეტული პირი იქნება, რომელსაც შესაბამისი გამოცდილება აქვს. მისივე თქმით, მთავარ პრიორიტეტებს შორისაა შეერთებულ შტატებთან თანამშრომლობა, მათ შორის Patriot-ის საჰაერო თავდაცვის სისტემების წარმოების ლიცენზიები, ევროპული ანტიბალისტიკური პროექტი, ევროკავშირში გაწევრიანების პროცესი, პოლონეთსა და უნგრეთთან ურთიერთობების გაღრმავება, ახლო აღმოსავლეთისა და სპარსეთის ყურის ქვეყნებთან თანამშრომლობა, ასევე ჩინეთთან და საერთაშორისო ორგანიზაციებთან ურთიერთობა.

ზელენსკის განცხადებით, ცვლილებები შეეხება ქვეყნის შიდა პოლიტიკასაც. მისი თქმით, განსაკუთრებული ყურადღება დაეთმობა ფრონტისა და სასაზღვრო რეგიონების გაძლიერებას, უკრაინის არმიისთვის იარაღისა და ყველა ტიპის დრონის მიწოდების გაზრდას, ზამთრისთვის მზადებას, სახელმწიფო კომპანიების რეფორმირებასა და უკრაინის აღდგენის შესახებ პარტნიორებთან მიღწეული შეთანხმებების სწრაფ განხორციელებას.