მუსიკოსი ნიკოლოზ რაჭველი საპარლამენტო უმრავლესობის ლიდერის, ირაკლი კირცხალიასგანცხადებას სოციალურ ქსელში გამოეხმაურა. მისი თქმით, ამჟამად უკრაინაში იმყოფება, სადაც მუსიკალურ პროექტებზე მუშაობს და, მიუხედავად რუსეთის საჰაერო თავდასხმებისა, საკუთარ საქმიანობას აგრძელებს.
რაჭველი წერს, რომ ლვოვიდან კიევში დაბრუნებისთანავე საჰაერო განგაში გამოცხადდა და ბალისტიკური რაკეტების გამო თავშესაფარში ჩასვლა მოუწია.
„ამ საღამოს ლვოვიდან ჩამოვედი კიევში, რადგან ხვალ რეპეტიცია მაქვს ორკესტრთან. ვამზადებთ ერთდროულად ორ საფესტივალო პროგრამას. შემოვდგი თუ არა ბინაში ფეხი, განგაში გამოცხადდა და ბალისტიკური რაკეტები გარშემო ჩამოვარდნენ... გავიქეცი თავშესაფარში... მერე შინ დავბრუნდი, რადგან სანოტო მასალა ხვალამდე უნდა მოვაწესრიგო...“
ამ კონტექსტში მუსიკოსი ირაკლი კირცხალიას მიმართავს:
„ჰოდა, ახლა მითხარით, ეს ვიღაც კვირცხალია (მგონი, სწორად მახსოვს მისი გვარი), მზადაა ამ რეალობას გაუძლოს იმისთვის, რომ ხვალ სიკეთე გააკეთოს?“
რაჭველი ასევე წერს:
„გულის ამრევია „ქართული ოცნება“, ბოლომდე! მე კი გპირდებით, რომ უკრაინელი ხალხის კვალდაკვალ ქართულ ხელოვნებას კიდევ უფრო მეტად შევაყვარებ ჩვენი დროის ჭეშმარიტ გმირებს! მე ვიპოვე ჩემი მისია!“
მისივე განცხადებით, პუტინის რეჟიმის მიმართ მისი დამოკიდებულება უცვლელია და მიაჩნია, რომ სამართლის აღდგენა უმაღლესი ღირებულებაა.
ნიკოლოზ რაჭველი საპარლამენტო უმრავლესობის ლიდერის, ირაკლი კირცხალიას იმ განცხადებას გამოეხმაურა, რომელშიც კირცხალიამ თქვა, რომ „გარე ინტერესებს არაერთი ადამიანი ემსახურება“ და მაგალითად დაასახელა იმ კულტურის წარმომადგენელთა სია, რომლებიც, მისი თქმით, 2008-2022 წლებში რუსეთში საქმიანობას არ ერიდებოდნენ, მათ შორის „სუხიშვილები“, ნიკოლოზ რაჭველი და პაატა ბურჭულაძე.
