კიტ კელოგი უკრაინის საკითხზე გამართული მოლაპარაკებების შემდეგ - დროა, წინ წავიდეთ
24.04.2025 ნახვები: 411
აშშ-ის სპეციალური წარმომადგენელი, კიტ კელოგი რუსეთ-უკრაინის ომის მხარეებს სამშვიდობო შეთანხმების მიღწევისკენ მოუწოდებს.
„დროა, წინ წავიდეთ პრეზიდენტ ტრამპის ომთან დაკავშირებული დირექტივით: შეწყვიტეთ მკვლელობები, მიაღწიეთ მშვიდობას და დააყენეთ ამერიკა პირველ რიგში“, - დაწერა კელოგმა სოციალურ მედიაში გამოქვეყნებულ პოსტში ლონდონში უკრაინის საკითხზე გამართულ შეხვედრაში მონაწილეობის შემდეგ.
კელოგმა აღნიშნა, რომ ლონდონში პრეზიდენტის ადმინისტრაციის ხელმძღვანელთან, ანდრეი ერმაკთან მოლაპარაკებები პოზიტიური იყო.
უკრაინის დელეგაციამ ევროპელ პარტნიორებთან და აშშ-ის პრეზიდენტის სპეციალურ წარმომადგენელთან, კიტ კელოგთან გუშინ ლონდონში შეხვედრები გამართა. უკრაინის საგარეო საქმეთა მინისტრმა, ანდრეი სიბიგამ სოციალურ ქსელ X-ზე განაცხადა, რომ კიტ კელოგთან კონსტრუქციული საუბარი შედგა.
„აშშ-ის სპეციალურ წარმომადგენელთან, გენერალ კიტ კელოგთან შეხვედრის დროს ჩვენ გვქონდა აზრთა კონსტრუქციული გაცვლა მშვიდობისკენ მიმავალ გზაზე. უკრაინას მსოფლიოში ყველაზე მეტად სურს ომის დასრულება. ვალდებულები ვართ, ერთად ვიმუშაოთ ამ მიზნის მისაღწევად“, - დაწერა სიბიგამ.
