საქართველოს ნიჩბოსნობაში ოლიმპიური ჩემპიონი ჰყავს. 1972 წლის ოლიმპიურ თამაშებზე ვიქტორ კრატასიუკი ორადგილიანი ბაიდარით ჩემპიონი გახდა.
კრატასიუკი ფოთში დაიბადა. ჰქონდა ბევრი მიწვევები, მაგრამ საბჭოთა კავშირის დანგრევის შემდეგაც კი არსად გადავიდა. ვარჯიში მალთაყვის ნიჩბოსნობისა და კანოეს ბაზაზე დაიწყო, რომელსაც არაერთი მაღალი დონის სპორტსმენი აღუზრდია. თუმცა, ამჯერად გაპარტახებულია.
სწორედ ამ ბაზას ესტუმრა კულტურის, სპორტისა და ახალგაზრდობის მინისტრი თეა წულუკიანი.
წულუკიანის თქმით, სპორტის ამ სახეობებში საქართველოს ჰყავს ბევრი პერსპექტიული ახალგაზრდა, რომელსაც ხელშეწყობა ესაჭიროება. მინისტრმა განაცხადა, რომ მომავალი საბიუჯეტო წლიდან, სამინისტროსა და ფოთის მუნიციპალიტეტის ჩართულობით შემუშავდება კონკრეტული სამოქმედო გეგმა.
„ფედერაციებთან შეხვედრების კვალდაკვალ, დავინახეთ კონკრეტული პრობლემები. განსაკუთრებით, ინფრასტრუქტურის მხრივ, რომელიც ქართულ სპორტში თითქმის ყველა სახეობას აწუხებს. ამ მხრივ გამორჩეულია კანოეს ეროვნული ფედერაცია, რომელსაც აქვს დიდი პოტენციალი, ჰყავს, კარგი, ახალგაზრდა, გამორჩეული სპორტსმენები. მათ განსაკუთრებული ხელშეწყობა ჭირდებათ. ამიტომ, დავათვალიერეთ ისტორიული ბაზა მალთაყვაში, რომელიც უნდა აღვადგინოთ. მომავალი წლიდან ჩვენ ყველაფერს გავაკეთებთ და ჩვენი კანოეს ფედერაციას შეეძლება ამარტო სპორტსმენები ავარჯიშოს, არამედ, მოსამზადებლად უცხოელი სპორტსმენებიც მიიღოს", - განაცხადა წულუკიანმა.
