საფრანგეთმა რუსეთის სახელმწიფო ნავთობკომპანიის ხელმძღვანელის, იგორ სეჩინის იახტა დააყადაღა

საფრანგეთის ხელისუფლებამ რუსეთის წინააღმდეგ დაწესებული სანქციების ფარგლებში, რუსეთის სახელმწიფო ნავთობკომპანიის, „როსნეფტის" ხელმძღვანელის, იგორ სეჩინის იახტა დააყადაღა.

როგორც „ბიბისი" საფრანგეთის ფინანსთა სამინისტროზე დაყრდნობით წერს, საბაჟო აგენტებმა იახტა გვიან ღამით მას შემდეგ დააყადაღეს, რაც გაირკვა, რომ სეჩინს გემის მფლობელი კომპანიის აქციების უმრავლესობა ეკუთვნის.

იახტა საფრანგეთში, მარსელში რემონტისთვის ჩავიდა, თუმცა დაყადაღების დროს ხომალდი დაგეგმილი სამუშაოების დასრულების გარეშე, სასწრაფოდ უკან გასამგზავრებლად ემზადებოდა.

ამასთან, გამოცემა „ფორბსი" წერს, რომ გერმანიის ქალაქ ჰამბურგში დააყადაღეს რუსი მილიარდერის ალიშერ უსმანოვის იახტა, რომელიც 600 მილიონამდე დოლარი ღირს.

გუშინ კონგრესში ყოველწლიური გამოსვლისას აშშ-ის პრეზიდენტმა ჯო ბაიდენმა განაცხადა, რომ აშშ ევროპელ მოკავშირეებთან იპოვის და დააყადაღებს მათ იახტებს, ძვირადღირებულ ბინებს და კერძო თვითმფრინავებს.

„მე ვეუბნები რუს ოლიგარქებსა და კორუმპირებულ ლიდერებს, რომლებმაც მილიონობით დოლარი იშოვეს ამ ძალადობრივი რეჟიმით, აშშ-ის იუსტიციის დეპარტამენტი რეაგირების გარეშე არ დატოვებს რუსი ოლიგარქების დანაშაულებს, ევროპელ მოკავშირეებთან ერთად, ჩვენ ვიპოვით და დავაყადაღებთ მათ იახტებს, ძვირადღირებულ ბინებსა და კერძო თვითმფრინავებს. ჩვენ მოვდივართ თქვენი არაკეთილსინდისიერი შენაძენებისთვის", - განაცხადა ბაიდენმა.