ირაკლი კობახიძე - ჩემთან იყო სატელეფონო საუბრები და პოლიტიკური ინტერესებისთვის კონსტიტუციის უხეშ დარღვევას ითხოვდნენ

ჩემთან იყო სატელეფონო საუბრები და ჩემგან ითხოვდნენ კონსტიტუციის, კანონმდებლობის ძალიან უხეშ დარღვევას პოლიტიკური ინტერესებისთვის, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“ სტუმრობისას განაცხადა.

კითხვაზე, – „თქვენს წინა ინტერვიუში ასეთი რამ თქვით, „ბევრი სხვა თემაც გვაქვს, მათ შორის სატელეფონო საუბრებში რას ითხოვდნენ ჩვენგან და ა.შ. ეს ყველაფერი არსებობს და მინდა, ყველას მოვუწოდო, დაიცვან წესები და იმოქმედონ წესების შესაბამისად, ჩვენი პრინციპია ის, რომ სასამართლო იყოს დამოუკიდებელი“, თუ შეგიძლიათ გვითხრათ, რას გულისხმობთ, როდესაც ამბობთ, რომ ეს ყველაფერი არსებობს და კონკრეტულად რას ითხოვდნენ თქვენგან?“ – კობახიძემ აღნიშნა, რომ დეტალებზე საუბრისგან ამ ეტაპზე თავს შეიკავებს. 

„ჯერ არ დავაკონკრეტებ შინაარსს, ვინ იყო და რას ითხოვდა, შემოვინახოთ ეს ჩვენს არსენალში, მაგრამ, რეალურად, შემიძლია გავიმეორო, რომ იყო სატელეფონო საუბრები ჩემთან და ისეთ რამეს ითხოვდნენ, რაც იყო გამაოგნებელი ჩემთვის. ჩემგან ითხოვდნენ ძალიან უხეშ დარღვევას კონსტიტუციის, კანონმდებლობის და ა.შ. ითხოვდნენ ამას უხეშად პოლიტიკური ინტერესებისთვის. ვიღაცას ჰქონდა რაღაც პოლიტიკური ინტერესი და ამის გამო ჩემგან ითხოვდა პირდაპირ, უხეშად კონსტიტუციის დარღვევას, სასამართლო სისტემას ეხებოდა ეს“, – აღნიშნა კობახიძემ.

კითხვაზე, იყო თუ არა კონკრეტული სუბიექტის განაჩენზე საუბარი, „ქართული ოცნების“ თავმჯდომარემ განაცხადა: „ჯერ არ ვიტყვი ამ ყველაფერს, გახმაურებული საქმე იყო. ალბათ დადგება დრო, როდესაც ამასაც დავაკონკრეტებ“.

ვითარების გარკვევა აუცილებელია, მაგრამ ჩვენი ამოცანა არ არის, ამ შეცდომაზე გამოვიჭიროთ აშშ-ის კონკრეტული სტრუქტურა, – ასე უპასუხა „ქართული ოცნების“ თავმჯდომარემ, ირაკლი კობახიძემ საქართველოს პირველი არხის გადაცემის „აქტუალური შაბათი – მაკა ცინცაძესთან ერთად“ წამყვანის შეკითხვას, რა ბერკეტები არსებობს აშშ-ის სახლმწიფო დეპარტამენტის გადაწყვეტილების გასაჩივრებისთვის და რა შეიძლება, მოიმოქმედოს ამ შემთხვევაში ხელისუფლებამ და სასამართლომ.

„ჩვენ არ ვართ მოსამართლეები. ვინმეს თუ უნდა გასაჩივრება, საქართველოში ეს ვერ გასაჩივრდება. თეორიულად, არ ვიცი, რამდენად შეიძლება, ამერიკაში გასაჩივრდეს, ამას ადგილობრივი იურისდიქცია ადგენს. აქ მე უნდა შევიდე თეორიულ მსჯელობაში და ეს ჩემთვის ვერ იქნება საინტერესო. მე არ ვარ უშუალოდ ადრესატი, ადრესატები არიან მოსამართლეები, მაგრამ ჩვენ, რა თქმა უნდა, ამაზე გვექნება პოლიტიკური რეაგირება“, – განაცხადა კობახიძემ.

მისი თქმით, როდესაც სანქცირდება პოლიტიკოსი, ეს პოლიტიკური აქტია, პოლიტიკაა და გასაგებია, რომ პოლიტიკოს შეუძლია პოლიტიკოსის დასანქცირება, მაგრამ საერთაშორისო სტანდარტით, მოსამართლე ნებისმიერ ქვეყანაში განსაკუთრებული ხელშეუხებლობით სარგებლობს და მისთვის გაფრთხილების მიცემაც კი, საქართველოს კანონმდებლობით იმდენად მკაცრად არის გაწერილი, რომ ბოლო წლების განმავლობაში არც ერთი მოსამართლისთვის გაფრთხილებაც კი არ შეუფარდებიათ.

„ანუ, არის რთული პროცედურა, საფუძვლები არის რთულად გაწერილი, რაც გასაგებია. მოსამართლეს ძალიან იშვიათ შემთხვევაში შეიძლება, შეეხოს ელემენტარული დისციპლინური სახდელიც კი, როგორიც არის გაფრთხილება და ასეთ დროს, როდესაც ასანქცირებ, სავიზო შეზღუდვას უწესებ, თუ რაც არის, რა მნიშვნელობა აქვს, როდესაც მოსამართლის წინააღმდეგ ასეთ ზომას იღებ, ეს უბრალოდ, გაუგონარი რამ არის. ეს ის კი არ არის, რომ ვიღაცას რაღაც შეცდომა მოუვიდა?! ეს არის გაუგონარი რამ. ჩვენ გვაქვს უმკაცრესი კანონმდებლობა ამ კუთხით, მათ შორის, მათი მოთხოვნით. ისინი იყვნენ ჩართული მეოთხე ტალღაში და ამ მეოთხე ტალღის ფარგლებში შემუშავდა დისციპლინური წარმოების დღევანდელი მოდელი. მათი კატეგორიული მოთხოვნა იყო, რომ მოსამართლეს გაფრთხილებაც კი, შეიძლება, შეუფარდო უკიდურეს შემთხვევაში, ძალიან რთული პროცედურით. ამას გვეუბნებოდნენ ორი წლის წინ“, – განაცხადა კობახიძემ.

როგორც კობახიძემ აღნიშნა, ახლა შეიცვალა მხოლოდ პოლიტიკური ინტერესი.

„ჩვენ ვხედავთ, რომ არის მიზანმიმართული შეტევა სასამართლოს დამოუკიდებლობაზე და ვიღაცას უნდა, თუნდაც გარკვეული დოზით აღადგინოს „ნაცმოძრაობის“ კონტროლი სასამართლო სისტემაზე. აი, ეს არის რეალურად. არის მაგალითად, ასეთი ინიციატივები, რომ პარლამენტმა ე.წ 2/3-ით მიიღოს გადაწყვეტილებები მაგალითად, უზენაესი სასამართლოს მოსამართლეთა დანიშვნაზე. სამართლებრივად, ეს არის სისულელე, არსად არ არის მსოფლიოში და ამას გთხოვენ გარედან. ეს წარმოუდგენელი რამ არის, მაგრამ ამას თავი დავანებოთ. ნახეთ, რას ითხოვენ – გადაწყვეტილებას 2/3 უმრავლესობიდან უნდა უჭერდეს მხარს და 2/3 ოპოზიციიდან. ეს იმას ნიშნავს, რომ ნებისმიერი მოსამართლის დანიშვნის დროს ერთგვარი საკონტროლო პაკეტი ხელში უჭირავს „ნაცმოძრაობას“. ამას პირდაპირ არც მალავენ. უნდათ, რომ გარკვეული მნიშვნელოვანი დოზით დაუბრუნონ „ნაცმოძრაობას“ ბერკეტები სასამართლოს მიმართ“, – განაცხადა კობახიძემ.

შეკითხვაზე, კონკრეტულად ვისგან მოდის ეს მცდელობა, აშშ-დან, თუ საიდან, ირაკლი კობახიძემ განაცხადა, რომ ეს მცდელობა მოდის არა მხოლოდ აშშ-სგან.

„არა მხოლოდ. არის სხვადასხვა სუბიექტი, რომელიც ასეთ რაღაცებს ითხოვს და საზოგადოებამ გამოიტანოს დასკვნები ამასთან დაკავშირებით“, – განაცხადა კობახიძემ.

მისივე თქმით, საზოგადოებას კარგად ახსოვს, რას ნიშნავს „ნაციონალური მოძრაობის“ კონტროლი სასამართლოზე და ხელისუფლება ამას ვერ დაუშვებს.