მიშას გაურკვეველი დაპირება: როდის ჩამოვა - 2 ოქტომბრამდე, 2 ოქტომბერს თუ 2 ოქტომბრის მერე

„მან თქვა: "ჩამოვალ არჩევნებზე", მაგრამ ერთხელაც არ უთქვამს, რომ ჩამოვა 2 ოქტომბერს ან 2 ოქტომბრამდე," - აცხადებს ჟურნალისტი და ისტორიკოსი დათო გამცემლიძე საქართველოს მესამე პრეზიდენტის, მიხეილ სააკაშვილის ვიდეომიმართვის კომენტირებისას, რომელშიც სააკაშვილმა საქართველოში დაბრუნება დააანონსა.

„ყურადღებით უნდა დავაკვირდეთ ხოლმე, რას ამბობს მიშა ან რატომ ამბობს იმ ფორმით და არა - სხვა ფორმით, რასაც ამბობს. მან თქვა: "ჩამოვალ არჩევნებზე", მაგრამ ერთხელაც არ უთქვამს, რომ ჩამოვა 2 ოქტომბერს ან 2 ოქტომბრამდე. სააკაშვილი უეჭველად გულისხმობს, რომ „არჩევნები" არ არის მხოლოდ არჩევნების დღე", - აცხადებს დათო გამცემლიძე.

გამცემლიძე განმარტავს, რომ არჩევნები არის პროცესი, მათ შორის, არჩევნების დღის შემდგომ მისი შედეგების ოფიციალურ გამოქვეყნებამდე.

„არჩევნები არის პროცესი. მათ შორის, 3 ოქტომბერი, როდესაც ოპოზიცია შეიტანს სარჩელებს და საჩივრებს, მათ შორის, მეორე ტურები და ა.შ. ამ აზრით 4 ოქტომბერიც არჩევნებია, 9 ოქტომბერიც, 15 ოქტომბერიც", - აცხადებს გამცემლიძე.

მისი თქმით, მესამე პრეზიდენტისთვის არჩევნები არის არჩევნების შემდგომი დღეების განმავლობაში ოპოზიციის აქტივობა და მასზე მმართველი პარტიის რეაგირება - ქმედებები.

„თუ ამ პროცესში გაიმართება დიდი მიტინგები. ხელისუფლება შეირყევა, მინისტრები გადადგებიან აცრემლებულნი....უიმე, დასავლური კურსი იცვლება დახმარებაზე უარი ვთქვითო... „ოცნების" მერყევი დეპუტატები ატეხენ ტყაპა-ტყუპს ოცნების გემიდან..., შსს-ც ჩამოიშლება.....ანუ "არჩევნები" მიშას ინტერპრეტაციით ფართო ცნებაა. 2003 წლის 2 ნოემბერიც არჩევნები იყო, 18 ნოემბერიც და 23 ნოემბერიც.....", - აცხადებს გამცემლიძე.